الحفريات

زائر

تطور

روح على: ناڤيجيشن, تدوير

تشارلز داروين و هو عنده 51 سنة بعد ما نشر كتاب حوالين اصل الانواع

التطور( في البيولوجيا-علم الحياة) هو العملية اللي بتتغير فيها للأحسن صفات الكائنات الحية . التطور كمان يتقصد بيه التغييرات البسيطة اللي بتحصل في الچينات من جيل للتاني و التغييرات الكبيرة اللي بتظهر بسببها كائنات حية جديدة من جد مشترك على مدى اجيال طويلة.التطور هو نظرية في علم البيولوچيا بتفرض ان كل اشكال الحياة على الارض زي الانسان و الحيوانات و النباتات اتطورو من اشكال بسيطة كانت موجودة قبليهم و ان الاختلافات الكبيرة بين الانواع دي هي عبارة عن اختلافات صغيرة خالص في الچينات بتاعة اجدادهم و اللي اتراكمت على مدى مليارات السنين و بقت اختلافات كبيرة زي ما بنشوفها دلوقتي. نظرية التطور بتعتبر دلوقتى من اهم الاساسيات اللي اتبنت عليها علوم بيولوچية تانية كتيرة في العصر الحديث. التنوع في اشكال الكائنات الحية كبير جدا و دلوقتي في 2 مليون نوع موصوف و متسمي و بيعتقد العلما ان في انواع تانية كتيرة جدا لسة مااتدرستش وممكن يوصل عددهم لحوالي 20- 30 مليون نوع. الحاجة الغريبة مش عدد الانواع و بس ، لا دا كمان التنوع الكبير في الاشكال و الاحجام وطريقة الحياة للانواع دي- من اول الباكتيريا اللي طولها واحد على الف من المللميتر لحد الاشجار الضخمة اللي ممكن يوصل طولها لـ 100 متر ووزنها لـ الاف الاطنان. و من الباكتريا اللي بتعيش في درجات حرارة قريبة من درجة الغليان (100 د.م.) لحد الفطريات و الطحالب اللي عايشة في القطب الجنوبي في درجة حرارة 23 تحت الصفر.

كل الاختلافات دي ممكن تتفسر بإنها نتيجة لعملية التطور و كل اشكال الحياة جت من جد واحد مشترك. في القرن التسعتاشر الف العالم الانجليزي تشارلز داروين كتاب اسمه (حوالين أصل الانواع) ونشر فيه عن نظرية التطور الحديثة و قدم تفسير علمي (صحيح بس مش كامل) لعملية التطور و ازاي و ليه بتحصل زي مثلا ليه في حيوانات عندها جناحات و عيون و كلاوي و الاعضاء دي متهندسة بشكل محكم علشان تقوم بوظيفة معينة.الانتخاب الطبيعي كان هو الاساس اللي بنى داروين عليه تفسيره العلمي للتطور. الانتخاب الطبيعي بيحصل لما يكون في افراد معينين عندهم صفات احسن من بقية المجموعة (زي السرعة في الجري او بعد النظر) الافراد دول بيكون عندهم قدرة احسن على مواجهة تحديات الطبيعة و بيقدرو يفوزو في الصراع على الاناث مثلا و بكدة بينجحو ينقلو الصفات الكويسة دي للاجيال الجديدة. علم الچينات اللي اتولد في القرن العشرين بين بالتفاصيل ازاي الانتخاب الطبيعي بيحصل و وخلا العلما يوصلو لبلورة نظرية كاملة عن التطور الحديث. من اول الستينات ظهر علم جديد تاني اسمه البيولوچيا الجزيئية و دا كان الثورة الحقيقية اللي بينت و لاول مرة بادق التفاصيل ازاي الچينات بتلعب دور في عملية التطور يعنى مثلا ازاي الچينات بتاعة الانسان و القرد متطابقين تقريبا في كل حاجة و نسبة الاختلاف بينهم ما بتعديش 1 او 2% بس.

الدليل على التطور

مراحل تطور الحصان

تشارلز داروين في القرن التسعتاشر اعتمد في استدلاله على التطور على دراسات مقارنة بين الكائنات الحية و توزيعها الجغرافي و على الحفريات بتاعة الكائنات المنقرضة. بمرور الوقت اكتشف العلما ادلة اكتر و اكتر من التلات مصادر دول و كلها بتأكد و بتقوي النظرية بتاعة داروين. ولقى العلما أدلة اكتر و اعمق و تأكيدات بالتفاصيل مع ظهور علوم بيولوچية جديدة ماكنتش موجودة على ايام داروين زي علم الجينات و البيوكيميا و الفسيولوچيا و الأيكولوچيا و الايثولوچيا(سلوك الحيوان). لدرجة ان العلما دلوقتي ما بقوش مهتمين انهم يدورو على أدلة جديدة على التطور و بيركزو دلوقتي على اكتشاف آليات التطور اللي بقى حقيقة علمية في البيولوچيا زي دوران الارض حوالين الشمس في علم الفلك .

الحفريات

الحفرية هي عبارة عن بقايا نادرة جدا لكائن حي كان عايش على الارض من زمان قوي، لما مات ماتحللش بعوامل الطبيعة او اتاكل بحيوانات تانية و اتحفظت حتت من جسمه (و خصوصا الحتت الجامدة زي السنان و العضم) و اتدفنت في الطمي اللي اتحجر بعدين و بقى صخور بتحفظ معلومات عن شكل الحيوان دا و اللي ممكن تحديد عمره عن طريق الراديوميتير و نعرف بالظبط هو مات امتا .العلما بيدرسو حفريات لالاف الكائنات الحية اللي ماتت من ملايين او حتى بلايين السنين و الدراسة دي بتبين:

1. في كتير الكائنات الحية اللي كانت عايشة زمان مختلفة جدا عن اي كائن حي عايش دلوقتي.

2. بمرور الوقت بتتبدل الحيوانات و النباتات بترتيب معين و الحفريات بتبين التحول من شكل للحياة لشكل تاني على مر الزمن.

تحديد العمر بالراديوميتر عرفنا مثلا ان الارض عمرها 4.5 بليون(مليار) سنة و ان اقدم حفرية لكائن حي زي الباكتيريا مثلا عمرها 3.5 بليون(مليار) سنة.و اقدم حفرية لحيوان عمرها 700 مليون سنة و اول حيوان ليه عمود فقري ظهر على الارض من 400 مليون سنة و اول حيوان ثديي عمره 200 مليون سنة و اقدم حفرية للانسان العاقل ما بتزيدش عمرها عن مليون سنة. تاريح الحياة المترتب دا و اللي اتعرف من الحفريات كان اقوى دليل على ان التطور نظرية صحيحة. لبسجل بتاع الحفريات صحيح بس مش كامل للاسف لأن عدد صغير جدا من الحيوانات و النباتات بقت حفريات و عدد محدود منهم هو اللي اكتشفه و درسه العلما و كمان مش كل الكائن الحي بيتحول لحفرية، بس عضمه او سنانه. مع ذلك ففي حيوانات قدر العلما يعيدو بناية التاريخ التطوري بتاعها بالكامل زي الحصان اللي ممكن تتبع تطوره على مر الزمان من اول ما كان حيوان حجمه قد حجم الكلب وارتفاعه 40 سم عن الارض و عنده صوابع في رجليه و سنان بتاعة حيوان رعي لحد الحصان الحالي.

النظام الموحد

عضلة ودن الانسان الضامرة بالنسبة لودن القرد

الهيكل العضمي بتاع الانسان و الضفدعة و السمكة و البطة متشابهين بطريقة غريبة جداً على الرغم من اختلاف طريقة حياة و بيئة العيشة بتاعة كل واحد من الحيوانات دي. الهياكل العضمية للكائنات دي ممكن مطابقتهم عضمة عضمة و نفس الشيئ ممكن نشوفه في باقي اجهزة اجسامهم. من الناحية العملية، الواحد صعب عليه يفهم ليه الانسان بيقدر يكتب و الضفدعة بتقدر تنط و السمكة تقدر تعوم و البطة تقدر تطير باعضاء مختلفة بس كلها مبنية بنظام واحد مكون من نفس عدد العضمات. لو الكائنات دي اتوجدت بشكل منفصل فإيه الداعي انهم يكونو متطابقين يالشكل دا؟ التفسير الوحيد هو انهم كلهم منحدرين من جد واحد مشترك ووارثين منه النظام بتاع الهيكل العضمي و اللي اتطور و اتحور علشان يلائم طرق مختلفة للحياة. النظام الموحد كان من اهم الادلة اللي دعمت نظرية التطور و خصوصا بعد اكتشاف العلما للاعضاء اللي مالهاش وظيفة زي الزايدة الدودية في الانسان و الفقارت العصعصية و عضلات الودن و حلمة البز عند الرجالة و ضرس العقل و الجفن التالت في العين.

نمو الاجنة

داروين و العلما التطوريين لقو ان دراسة الاجنة بتدعم نظريتهم و اكتشفو ان كل اجنة الفقاريات بما فيها الانسان بتنمو بنفس الطريقة و بتمر بنفس المراحل. جنين الانسان في فترة معينة بيبقى عنده خياشيم مكان رئته و بيكون عنده ديل في الاسبوع الرابع و بيوصل لقصى طول ليه في الاسبو السادس و بعديها بيصغر لحد ما بيتحول للفقارات العصعوصة، و بيتغطى جسمه بالشعر بالكامل و شوية شوية بيفقد الخصايص دي عند وقت الولادة بس مراحل نمو الجنين دي كأنها بتعبد تاريخ التطور بتاع الانسان مرة تانية بس بسرعة اكبر بكتير.

التوزيع الجغرافي

كل قارة من قارات العالم عندها الحيوانت و النباتات الخاصة بيها.افريقيا مثلا فيها وحيد القرن،فرس النهر(سيد قشطة)الزراف و الاسود و الحمير المخططة و الشيمبانزي و الغوريللات. امريكا اللاتينية و اللي على نفس خط العرض بتاع افريقيا و بتشبهلها في الظروف البيئية مافيهاش و لا واحد من الحيوانات دي و على العكس فيها البوما،الجاجوار،الالاما،الراكوون. مافيش اي سبب يمنع الحيوانات بتاعة القارة دي انها تعيش في القارة التانية او العكس، التفسير الوحيد للظاهرة دي هو عملية التطور اللي بتقول ان الانواع نشأت من انواع سابقة كانت موجودة في بيئات معينة قبل القارتين دول ما ينفصلو عن بعض و تتطور حيوانات كل واحدة منهم بشكل مستقل.

البيولوجيا الجزيئية

و دي من العلوم الحديثة اللي ماكنتش لسة طلعت ايام داروين و مع ذلك فهي دلوقتي بتعتبر اقوى الادلة على صحة نظرية التطور لانها اثبتت ان كل اشكال الحياة من الباكتيريا للانسان جايين من جد واحد مشترك. في تشابه كبير جدا في الجزيئات اللي بيتكون منها اي كائن جي و في الطريقة اللي بتشتغل بيها الجزيئات دي. كل الكائنات الحية( من الباكتريا للطخالب للنباتات و للطيور و الانسان) ليها دي ان اية(الحمض النووي) اللي بتترجم لنفس البروتينات في كل اشكال الحياة. و دا ممكن نشبهه بتلات كلمات موجودين في تلات كتب و ليهم نفس المعنى يبقى طبيغي ان اللغات اللي اتكتبت بيها الكتب دي من اصل واحد.

تاريخ التطور

التطور بتاع الانسان

من زمان و كل مجتمع بشري ابتدع نسخته الخاصة و تفسيره الميثولوجي عن اصل الحياة و اصل الكون . الديانات الابراهيمية فسرت دا على انه من صنع اله كلي -القدرة، فلاسفة اليونان القدام كان عندهم اساطيرهم بتاعة بداية الخلق و الهة جبل الاوليمب، انيكسيماندر قال ان الحيوانات ممكن تتحول من شكل للتاني و القديس اوجوستين كانت عنده افكار قريبة من نظرية التطور و اللي دفعه لكدا اسباب دينية مش علمية، لانه كان شايف انه مستحيل يكزن النبي نوح خد عينات من كل انواع الكائنات الحية في سفينته المشهورة علشان ينقذهم من الطوفان و اقترح اوجوستين امكانية الانواع دي ظهرت بعد طوفان نوح و ماكانش شايف اي تعارض بين التطور و الخلق المنفصل بتاع سفر التكوين. فكرة التطور اتبلورت بشكل علمي من اول عصر النهضة و من العلما اللي كان ليهم نظريات في الموضوع دا فبل داروين العالم الفرنساوي لا مارك اللي اعتقد بصحة التطور و الاصل المشترك لكل مضاهر الحياة و على راسها الانسان بس وقع في الغلط بتاع آلية التطور و قال ان الصفات المكتسبة بتتورث (مبدأ اللاماركية) يعنى اذا زرافة اتمرنت على اكل ورق الشجر العالي و رقبتها طولت شوية بسبب محاولاتها دي فالصفة المكتسبة دي بتاعة طول الرقبة ح تتورث للجيل التاني من اولادها و دا طبعا مش صحيح. نظرية التطور الحديثة اتأسست على إيد تشارلز دارون اللي عمل جولة حوالين العالم على السفينة المشهورة بيجيل و استمرت خمس سنين ( من 1831 لحد 1836 ) و نشر اول كتاب ليه سنة 1859 و كان اسمه (حوالين اصل الانواع بطريقة الانتخاب الطبيعي )و اللي لأول مرة حدد الدور المهم بتاع الانتخاب الطبيعي في تحديد مسار التطور و بعديها نشر كتب تانية كتيرة زي (سنة 1871) اصل الانسان و اللي مد فيه نظريته على البشر و خلاهم يخضعو لنفس المبدأ بتاع الانتخاب الطبيعي و شوية شوية قدر العلما يعيدو بناية التاريخ التطوري للانسان.

الرؤيه الدينيه

المقال ده أو الحته دى ناقصها الدليل بمصادر.
ياريت تحسن المقال بحط مصادر مناسبه. يعنى المعلومات المش مؤكده ممكن التشكيك فيها و مسحها.

فى انتقادات كتير بتتوجه لنظرية التطور و ساعات بتبقا انتقادات من بيولوجيين من منطلق علمى و ساعات بتيجى من رجال دين من منطلق عقائدى.النقد الدينى لنظرية التطور بيقوم على فكرة التعارض بين خلق الله للانسان بشكل منفصل عن بقية الكائنات الحية بحسب ايات القران و الانجيل و التوراة اللى بتقول كلها على ان البشر كلهم جايين من اب واحد و ام واحده هما ادم و حوا.الناس اللى بتوجه النقد اللى م النوع دا للتطور بيتقال عليهم الخلقيين (Creationists) او اللى بيؤمنو بنظرية الخلق و بيلخصو نقدهم فى جمل من نوع (الكائنات الحية ما نشأت ش نتيجة مصادفة عميا، بس خلقها إله.)

فى ناس تانيين بيلومو نظرية التطور و افكار داروين و بيتهمومها بانها السبب فى ظهور افكار زى النازيه^{[عايز مصدر]}

و اللى قالت ان الاريين هما جنس اسمى و اكتر تطور من باقى البشر و فى النهاية اتسببت فى قتل الملايين من الناس فى الحرب العالميه التانيه بدعوى الصراع من اجل البقاء و ان البقاء ح يكون للاقوى (اللى هما الجنس الارى). بالنسبه للبيولوجيين فاغلبهم بيؤمنو بصحة نظرية التطور و اللى احتل موقع فى علم البيولوجيا مساوى لموقع دوران الارض حوالين الشمس فى علم الفلك. فى نفس الوقت مجموعه صغيره م البيولوجيين اللى بيعتقدو ان نظرية التطور عاجزه^{[عايز مصدر]} عن تفسير التنوع البيولوجى الرهيب الموجود دلوقتى و بيتفقو مع الخلقيين فى ضرورة^{[عايز مصدر]} وجود تصميم ذكى لكل مظاهر الحياه و استحالة^{[عايز مصدر]} تفسيرها بالاعتماد على الصدفه وحدها او على قوانين الداروينية. و من اكتر الحجج اللى بيسوقها البيولوجيين دول هو عدم^{[عايز مصدر]} وجود سجل حفرى كامل لاغلب الكائنات الحية و انه لحد دلوقتى مالقاش^{[عايز مصدر]} العلما حلقات وصل متحفرة بين الطيور و الاسماك مثلا او بين القرود و الزراف ك مثال تانى.

الحفريات Icon_sunny